أحسن لابتوبات للبرمجة في مصر لكل ميزانية، من 15 ألف وطالع

لو هتتعلم برمجة أو داخل حاسبات ومعلومات، مش لازم تبدأ بلابتوب بـ 40 ألف. تقدر تبدأ بأقل من كده بكتير.

الصفحة دي للي بيختار أول لابتوب للبرمجة في مصر. هتلاقي فيها لابتوبات في كل ميزانية من 15 ألف وطالع، جديدة واستيراد، بأسعارها ولينكات المحلات، وتقدر تعمل إيه بكل واحدة.

المواصفات اللي في الفيديو (RAM 16GB، ومعالج مش فئة U، و SSD 512GB) هي اللي هتخليك مرتاح. لكن لو ميزانيتك أقل، تقدر تبدأ تتعلم عادي جدًا، وتحت هتلاقي تقدر تعمل إيه في كل ميزانية.

المواصفات اللي في الفيديو، وليه#

• رامات 16GB. الـ IDE والمتصفح بكذا tab والـ emulator أو Docker شغالين مع بعض. الـ 8 جيجا بتكفي للبداية، بس بتخلص بسرعة لما الشغل يكبر.
• معالج Ryzen 5 أو Core i5، بس مش فئة U. حرف U في آخر اسم المعالج معناه إنه معمول لتوفير البطارية، فبيبقى أبطأ في الـ build والـ compile. الأحسن H أو HS أو HX.
• مساحة 512GB SSD. الـ SSD بيخلّي الويندوز والبرامج تفتح في ثواني. ابعد عن الـ HDD.
• ميزة زيادة: رامات تقدر تزودها. لو اللابتوب فيه مكان فاضي (slot) للرامات، تقدر تبدأ بـ 8 جيجا وتزود بعدين.

اختار على قد ميزانيتك#

من 15 لـ 20 ألف: تبدأ تتعلم#

لما دوّرت يوم 12 نوفمبر، ملقيتش لابتوب جديد متوفر تحت 24 ألف تقريبًا يستاهل: اللي موجود في الرنج ده كان Celeron و 4 جيجا رامات، ودول هيتعبوك. فالحل في الميزانية دي هو لابتوب استيراد (هتلاقي شرحه كامل تحت).

• ينفع لـ: أساسيات الـ web (HTML و CSS و JavaScript)، و Python، و C++، وحل المسائل، و VS Code.
• هتضحي بـ: الـ Android Emulator، و Docker، والـ IDEs التقيلة وهي مفتوحة مع حاجات كتير، وأي حاجة AI.
• بعدين: أغلب لابتوبات الشركات دي فيها مكان للرامات، فتقدر تزود لـ 16 جيجا لما تحتاج. اسأل المحل قبل ما تشتري.

Dell Latitude 5420 (استيراد)

• المواصفات: Core i5-1145G7 و 8 جيجا رامات و 256 جيجا SSD، شاشة 14 بوصة.
• مناسب لـ: تبدأ بيه وانت مرتاح في الأساسيات، وجسمه متين.
• السعر: B.TECH، قسم لاب توب استيراد: 13,500 جنيه (البايع GMP، حالته «فئة A»، وضمان 6 شهور، والكيبورد إنجليزي بس)

Dell Latitude 7490 (استيراد)

• المواصفات: Core i7-8650U و 8 جيجا رامات و 256 جيجا SSD، شاشة 14 بوصة.
• مناسب لـ: نفس اللي فوق، بمعالج i7 من جيل أقدم.
• السعر: B.TECH، قسم لاب توب استيراد: 14,200 جنيه (البايع MyComputer2000، «فئة A»، والضمان مش مكتوب في الصفحة، فاسأل عليه)

HP ProBook 640 G8 (مستعمل)

• المواصفات: Core i5-1145G7 و 8 جيجا رامات و 256 جيجا SSD، شاشة 14 بوصة FHD.
• مناسب لـ: لو عايز ضمان من المنصة اللي بتبيع ونفس مستوى الـ Latitude 5420.
• السعر: موبايل مصر: 18,715 جنيه (مستعمل حالته good، وضمان 90 يوم من موبايل مصر، ومعاه تقرير فحص)

من 20 لـ 30 ألف: أول لابتوب جديد ينفع#

هنا هتلاقي لابتوبات جديدة بضمان الوكيل، بس كلها بمعالجات فئة U و 8 جيجا رامات. ده مقبول جدًا في الميزانية دي للتعلم، والمهم يبقى فيه مكان فاضي تزود فيه الرامات بعدين.

• ينفع لـ: كل اللي في الرنج اللي فات، و React و Node.js ومشاريع الكلية، وكمان Android Studio بس هيبقى تقيل شوية.
• هتضحي بـ: الشغل التقيل وكذا حاجة تقيلة مفتوحة مع بعض، لحد ما تزود الرامات لـ 16 جيجا.

ASUS ExpertBook P1503CVA

• المواصفات: Core 3 100U و 8 جيجا DDR5 و 256 جيجا SSD، شاشة 15.6 بوصة FHD.
• مناسب لـ: اللي عايز يكبّر الجهاز مع الوقت: فيه مكانين للرامات، والرامات تزيد لحد 64 جيجا حسب موقع ASUS. عيبه إن المساحة 256 بس.
• السعر: 2B: 25,999 جنيه

Dell Inspiron 3520

• المواصفات: Core i3-1215U و 8 جيجا رامات و 512 جيجا SSD، شاشة 15.6 بوصة FHD، من غير ويندوز.
• مناسب لـ: أرخص لابتوب جديد معقول لقيته، ومساحته 512. مقدرتش أتأكد من موقع Dell إن فيه مكان فاضي للرامات، فاسأل المحل.
• السعر: B.TECH: 24,444 جنيه (البايع MyComputer2000)

ASUS Vivobook 15 X1504VA-BQ4615W

• المواصفات: Core 5 120U و 8 جيجا رامات و 512 جيجا SSD، شاشة 15.6 بوصة FHD، بويندوز 11.
• مناسب لـ: أقوى معالج في الرنج ده، و 8 جيجا متركبة في البوردة ومعاها slot فاضي.
• السعر: Dream 2000: 28,340 جنيه

MSI Modern 15 F1MG

• المواصفات: Core 5 120U و 8 جيجا DDR4 و 512 جيجا SSD، شاشة 15.6 بوصة FHD.
• مناسب لـ: نفس معالج الـ Vivobook، وفيه مكانين للرامات حسب مواصفات MSI، والرامات DDR4 أرخص لما تيجي تزود.
• السعر: Amazon.eg: 28,999 جنيه (البايع Amazon.eg)

ولو عايز 16 جيجا من الأول في نفس الميزانية، دي أمثلة استيراد:

• HP EliteBook 845 G8 (Ryzen 7 PRO 5850U و 16 جيجا و 256 SSD): 22,800 جنيه في B.TECH (البايع Lap-Tech، «فئة A»، ضمان 6 شهور)
• Dell Latitude 7420 (Core i7-1165G7 و 16 جيجا و 512 SSD): 25,999 جنيه في B.TECH (البايع MyComputer2000، «فئة A»، الضمان مش مكتوب)
• Dell Latitude 5440 (Core i5-1335U و 16 جيجا و 256 SSD): 27,900 جنيه في B.TECH (البايع MyComputer2000، «فئة A»، الضمان مش مكتوب)

من 30 لـ 45 ألف: مواصفات الفيديو#

هنا بتجيب المواصفات اللي في الفيديو بالظبط: 16 جيجا رامات، ومعالج فئة H، و SSD 512. ده الرنج اللي هتشتغل فيه مرتاح في أغلب مجالات البرمجة.

Lenovo IdeaPad Slim 3 15IRH10 (من الفيديو)

• المواصفات: Core i5-13420H و RAM 16GB و SSD 512GB، شاشة 15.3 بوصة، ووزنه حوالي 1.6 كيلو.
• الرامات: 8 جيجا منها متركبة في البوردة ومعاها slot واحد، فتقدر توصل لـ 24 جيجا.
• مناسب لـ: لو هتشيله كل يوم للكلية أو الكورس، وشغلك web أو mobile أو backend من غير جرافيكس تقيلة.
• الأسعار:
  • Dream 2000: 41,444 جنيه (بويندوز 11، موديل 83K101EUED)
  • Sigma Computer: 41,999 جنيه (من غير ويندوز، موديل 83K100FLED)
  • 2B: 42,999 جنيه (بويندوز 11)
  • Amazon.eg: 42,999 جنيه (بويندوز 11، البايع Amazon.eg)

Lenovo ThinkBook 16 G7 ARP (من الفيديو)

• المواصفات: Ryzen 5 7535HS و RAM 16GB و SSD 512GB، شاشة 16 بوصة، والرامات تزيد لحد 64 جيجا.
• السعر: مش متوفر دلوقتي في B.TECH ولا 2B ولا Raya ولا Amazon.eg ولا Dream 2000 ولا Sigma. لقيته في Compumarts بس مكتوب عليه «Coming Soon» ومن غير سعر حقيقي.

ASUS Vivobook 16 X1607CA-MB155W

• المواصفات: Core Ultra 5 225H و RAM 16GB و SSD 512GB، شاشة 16 بوصة، بويندوز 11.
• مناسب لـ: لو عايز شاشة أكبر ومعالج أحدث بنفس ميزانية الـ IdeaPad. الـ 16 جيجا متركبة في البوردة ومعاها slot فاضي.
• السعر: B.TECH: 42,599 جنيه (بتبيعه B.TECH نفسها)

45 ألف وطالع: للشغل التقيل#

لو هتشتغل AI و Machine Learning على جهازك، أو Game Development، أو هتشغّل emulators و Docker كتير مع بعض، هنا كارت الشاشة المنفصل (RTX) والمعالجات الأقوى بيفرقوا.

HP Victus 15-fa1082wm (من الفيديو)

• المواصفات: Core i5-13420H و RAM 16GB و SSD 512GB، وكارت RTX 4050، شاشة 15.6 بوصة 144Hz.
• مناسب لـ: Game Development، وتجارب AI على جهازك. أتقل في الشيل من الـ IdeaPad.
• الأسعار:
  • B.TECH: من 62,500 لـ 68,112 جنيه حسب البايع (السعر اللي بيظهر الأول 67,400)
  • Amazon.eg: 67,277 جنيه (البايع FLASH-TECH)
  • موديل قريب، 15-fa2082wm، في Sigma Computer بـ 56,000 جنيه. بس كارت الشاشة فيه شغال على باور أقل (50W) والكيبورد إنجليزي بس.

أقوى، من 72 لـ 85 ألف تقريبًا:

Lenovo ThinkPad E16 Gen 3 21SR0063ED

• المواصفات: Core Ultra 7 255H و RAM 16GB و SSD 512GB، شاشة 16 بوصة، من غير كارت شاشة منفصل.
• مناسب لـ: Docker و Virtual Machines وكذا برنامج مع بعض. الرامات تزيد لحد 64 جيجا. متلخبطش بينه وبين نسخ معالجها 256V أو 258V، دي رامتها مبتزيدش.
• الأسعار:
  • B.TECH: 72,220 جنيه (البايع Lap-Tech، والضمان 30 يوم بس)
  • Raya Shop: 84,796 جنيه (البايع Ellite for Trade، والضمان سنتين)
  • ولو عايزه أصغر: ThinkPad E14 Gen 7 بنفس المعالج وشاشة 14 بوصة، في B.TECH بـ 72,220 جنيه (البايع Lap-Tech)

Acer Nitro V 15 ANV15-52-9703

• المواصفات: Core i9-13900H و RAM 16GB و SSD 512GB، وكارت RTX 5060 8GB، شاشة 15.6 بوصة 165Hz.
• مناسب لـ: أرخص لابتوب بـ RTX 5060 لقيته متوفر. مقدرتش أتأكد من موقع Acer إن الرامات بتتزود، فاسأل المحل.
• الأسعار:
  • 2B: 74,999 جنيه
  • Raya Shop: 76,499 جنيه (البايع Egypt laptop)
  • B.TECH: 76,899 جنيه (البايع egypt_laptop، والضمان 30 يوم بس)

ASUS TUF Gaming F16 FX608JHR-RV057W

• المواصفات: Core i7-14650HX و RAM 16GB و SSD 512GB، وكارت RTX 5050 8GB، شاشة 16 بوصة 165Hz.
• مناسب لـ: معالج HX قوي وشاشة كبيرة، والرامات تزيد لحد 64 جيجا.
• الأسعار:
  • B.TECH: 77,499 جنيه (بتبيعه B.TECH نفسها، والضمان سنة)
  • 2B: 82,999 جنيه
  • Raya Shop: 83,555 جنيه (البايع Arab Business)

الأقوى، حوالي 90 ألف:

Lenovo LOQ 15IRX10 83JE00WVED

• المواصفات: Core i7-14700HX و RAM 16GB و SSD 512GB، وكارت RTX 5060 8GB، شاشة 15.6 بوصة 144Hz، من غير ويندوز.
• مناسب لـ: أقوى معالج في الصفحة. هيفرق معاك في Unity و Unreal، وتدريب موديلات صغيرة على الـ GPU. الرامات تزيد لحد 32 جيجا.
• الأسعار:
  • B.TECH: 90,000 جنيه (البايع Lap-Tech)
  • Amazon.eg: 90,689 جنيه (البايع Amazon.eg)
  • Raya Shop: 90,689 جنيه (البايع Ellite for Trade)

ASUS TUF Gaming F16 FX608JMR-RV057W

• المواصفات: Core i7-14650HX و RAM 16GB و SSD 512GB، وكارت RTX 5060 8GB، شاشة 16 بوصة 165Hz، بويندوز 11.
• مناسب لـ: نفس الـ TUF اللي فوق بكارت RTX 5060، والرامات تزيد لحد 64 جيجا.
• الأسعار:
  • 2B: 89,999 جنيه
  • B.TECH: 89,999 جنيه (بتبيعه B.TECH نفسها، والضمان سنة)
  • Raya Shop: 92,000 جنيه (البايع Arab Business)

لابتوب «استيراد»: يعني إيه، وتجيبه منين#

يعني إيه استيراد؟#

في السوق المصري، «لابتوب استيراد» يعني لابتوب جاي من بره، غالبًا من أوروبا أو أمريكا أو الخليج، وكان شغال قبل كده في شركة. الشركات بتغيّر أجهزتها كل كام سنة، فالأجهزة دي بتتباع مستعملة أو متجددة (refurbished)، ومعظمها لابتوبات business متينة.

اللي لازم تعرفه:

• بيبيعه تاجر أو محل مستقل، حتى لو معروض على موقع كبير زي B.TECH.
• الضمان من المحل أو المنصة، مش من الوكيل الرسمي. لقيت ضمانات من مفيش خالص لحد 6 شهور حسب البايع.
• الحالة بتتكتب بدرجات زي «فئة A» و«فئة B»، ومعناها بيختلف من تاجر للتاني، فشوف الجهاز بعينك.
• الكيبورد ممكن يبقى إنجليزي بس، أو بشكل حروف مختلف (US أو UK)، والشاحن ممكن يبقى بفيشة مختلفة. اسأل عن ده.
• الويندوز: اسأل هل الويندوز متفعّل ولا لأ.

الفرق في السعر ممكن يبقى كبير#

مثال حقيقي من نفس الموقع ونفس اليوم: Dell Latitude 5440 جديد (Core i5-1335U و 8 جيجا و 256 SSD) كان بـ 49,699 جنيه بضمان سنة. ونفس الموديل استيراد بـ 16 جيجا رامات كان بـ 27,900 جنيه، يعني أقل بحوالي 22 ألف، بس الضمان مش مكتوب في صفحته.

رأيي: لو لقيت نسخة استيراد حالتها كويسة، وفرق السعر بينها وبين الجديد كبير، تبقى صفقة كويسة. بس افحصها كويس الأول، وخد الضمان مكتوب.

أشهر الأنواع في الاستيراد، وليه كويسة للتعلم#

أكتر حاجة هتلاقيها: Dell Latitude، و HP EliteBook و ProBook، و Lenovo ThinkPad. دي لابتوبات معمولة للشركات، فجسمها متين، والكيبورد بتاعها مريح في الكتابة، وأغلبها فيه مكان للرامات تزود فيه بعدين.

تجيبه منين؟#

• مول البستان في وسط البلد (باب اللوق، جنب التحرير): من أشهر الأماكن اللي فيها محلات كمبيوتر جديد ومستعمل.
• أماكن تانية معروفة بمحلات الكمبيوتر: مول النخيلي في التحرير، وسوق العصر ومولات السخاوي في روكسي (مصر الجديدة)، ومول سفنكس في المهندسين، و Technology Mall في مدينة نصر.
• أونلاين: فيه قسم «لاب توب استيراد» في B.TECH فيه بايعين كتير، و موبايل مصر بيبيع لابتوبات مستعملة من محلات معتمدة بضمان من 30 لـ 90 يوم.

مش كل محل في الأماكن دي بيبيع استيراد، والأسعار في المحلات غالبًا مش منشورة أونلاين، فلف وقارن.

قبل ما تدفع: افحص الجهاز في المحل#

• البطارية: افتح Command Prompt واكتب powercfg /batteryreport، وقارن الـ Design Capacity بالـ Full Charge Capacity، وبص على الـ Cycle Count. لو الفرق كبير، البطارية تعبانة.
• الشاشة: افتح صورة لون واحد (أبيض وأسود) ودوّر على نقط ميتة أو بقع.
• الكيبورد والمداخل: جرّب كل الزراير، وكل USB، والـ HDMI، والسماعات، والكاميرا، والـ Wi-Fi.
• الشاحن: يبقى أصلي وبنفس الوات اللي الجهاز محتاجه.
• الجسم: شوف لو فيه شروخ، والمفصلات مش سايبة.
• مفيش قفل: اتأكد إن مفيش باسورد على الـ BIOS، والجهاز مش متربط بإدارة شركة (MDM أو Autopilot أو Computrace).
• الويندوز: متفعّل ولا لأ.
• الضمان مكتوب: اكتب مدته وايه اللي بيغطيه على الفاتورة.
• جرّبه في المحل نص ساعة على الأقل قبل ما تمشي.

إزاي توفّر#

• اشتري 8 جيجا مع مكان فاضي، وزود بعدين. رامة 8 جيجا DDR4 للابتوب كانت من 2,900 جنيه في Compumarts و 3,100 جنيه في Sigma. بس خلي بالك: رامة 8 جيجا DDR5 كانت أغلى بكتير، 8,200 جنيه على Amazon.eg. فلو اللابتوب DDR5، ممكن يبقى أوفر تجيبه 16 جيجا من الأول.
• الـ SSD أهم من أي حاجة. SSD صغير أحسن بكتير من HDD كبير.
• متدفعش في كارت شاشة مش هتستخدمه. كارت RTX محتاجه بس لو هتعمل Game Development أو 3D أو AI على جهازك. للـ web والبرمجة العادية مش ضروري.
• من غير ويندوز (DOS) أرخص في أغلب المحلات، لو هتسطّب نظام بنفسك.

احفظ الصفحة دي، وقبل ما تشتري افتح اللينك وشوف السعر ورقم الموديل النهارده.